ప్రభుత్వమే అధికారికంగా ఓ బయోపిక్‌ను ప్రకటించిందంటే… దాని ప్రాముఖ్యత సాధారణం కాదు. ఇది కేవలం సినిమా కాదు – ఓ చారిత్రక ఘట్టాన్ని మళ్లీ ప్రాణం పోసే ప్రయాణం. ఇప్పుడు అలాంటి గొప్ప యత్నానికి శ్రీకారం చుట్టింది మహారాష్ట్ర ప్రభుత్వం.
దేశ చరిత్రలో తనదైన ముద్ర వేసిన మరాఠా రాణి అహల్యాబాయి హోల్కర్‌ జీవితం, త్వరలో వెండితెరపై ప్రేక్షకులను సందడి చేయబోతోంది!
ఈ ప్రాజెక్టును ఆమె 300వ జయంతిని పురస్కరించుకుని సీఎం దేవేంద్ర ఫడణవీస్ స్వయంగా ప్రకటించటం విశేషం. దేశానికి ఆదర్శంగా నిలిచిన ఆమె ధైర్యం, పరిపాలన చాతుర్యం, సామాజిక న్యాయం పట్ల చూపిన ప్రాముఖ్యత… ఇవన్నీ ఇప్పుడు ఒక గొప్ప విజువల్ అనుభవంగా మారబోతున్నాయి.
మరాఠీతో పాటు ఇతర భాషల్లోనూ విడుదలయ్యే ఈ చిత్రం, దూరదర్శన్ మరియు ప్రముఖ ఓటీటీ ప్లాట్‌ఫామ్స్‌ ద్వారా మరింత విస్తృత ప్రేక్షకులకు చేరువ కాబోతుంది. ఇది ఒక ప్రాజెక్ట్ మాత్రమే కాదు – ఇది ఒక భావోద్వేగం.
ఇటీవలి కాలంలో విడుదలైన మరాఠా వీరుడు శంభాజీ మహారాజ్ ఆధారంగా రూపొందిన ‘ఛావా’ సినిమా సంచలన విజయం సాధించిన తర్వాత, ఇప్పుడు అహల్యాబాయి బయోపిక్‌పై అంచనాలు ఆకాశాన్ని తాకుతున్నాయి.
వీరుల గొప్పతనం కేవలం పాఠశాల పుస్తకాల్లోనే మిగిలిపోకూడదని భావించిన వారికి ఇది నిజమైన పండుగ!
రాణి అహల్యాబాయి జీవిత గాథ ఎలా రూపం దాలుస్తుందోనని దేశం మొత్తం ఉత్కంఠగా ఎదురుచూస్తోంది.
